القائمة الرئيسية

الصفحات


عجيب وغريب

عجيب وغريب، هاد الصباح لقيت شي "وطنيين" منتشرين في أرض الفيسبوك ينتقدون فرحة شعب الكرة بانتصار الجزائر،، بعيدا على الجورة وعلى السياسة، وبعيدا كذلك حتى على هاد الميساج الشعبي العفوي ان مؤامرات الحكام هنا ولهيه مدات والو من شعور شعب واحد (هاكا كنشوف المغاربة والدزايريين) ،، بعيدا على هاد الشي كلو: ما فهمتش هادا لي كيعطي الحق لراسو يناقش فرح الناس،، الفرح والحزن شأن شخصي،، لا يخضع للوصاية،، واحد فرح لخوه ربح،، انت اش دخل شطايطك؟ وحتى انت لبغيتي تبكي حيت الدزاير تاهلت، معند الحق حتى شي واحد يناقشك،، ملي وصلنا للوصاية في الفرح على ماتش دالكورة، عرف ان بنادم ماشي غير مكيحترمش حريات الناس، بل كيتدخل حتى في مشاعرهم..





ديك الفرحة ماكانتش مدفوعة من جهة ما، كانت مشاعر عفوية،، شعور جماعي،، المغاربة العاديين كيلقاو بلي الجزايريين كيشبهوليهوم فكلشي،لذلك حتى الأغنية الجزائرية بالدارجة ولا بتمازيغت عندها اكبر جمهور فالمغرب،، و المغاربة البارح كانو كيشجعو الجزائر حيت كيشوفو فمنتخبهم شي لي كانو كيتمناو يكون في المنتخب المغربي: الكرة متقونة، القتالية، روح الفريق، الانضباط، مدرب ولد البلاد،، وطبعا كاين جزء كان باغي الجزائر تربح على ود الحراك ديالها، ولكن في اعتقادي ماشي هو الفئة الغالبة،، هاد الشعور الجماعي بين الشعوب لي كتجمعها قواسم مشتركة ماشي حاجة لي خاص الواحد يستاهن بيها،، خصوصا ملي كتكون عفوية ،وجاية من القاع الاجتماعي، من الناس لي بعيدة على الهدرة الغليضة ديال الجيوستراتيجيا والنموذج التنموي والسكوبي..
بس: صحاب الوطنجية لي دخلو مشكل الصحراء في الكرة، وبغاو الدزاير تخسر،، واش معرفينش بلي سياسيا نيجيريا محسوبة على محور:الجزائر نيجيريا جنوب إفريقيا، واخا ديك اتفاق أنبوب الغاز،،،
هل اعجبك الموضوع :